దాయాది పాకిస్తాన్ తో చర్చల విషయమై కేంద్ర హోంమంత్రి అమిత్ షా కీలక వ్యాఖ్యలు చేశారు. పాకిస్తాన్ తో చర్చలు జరిపే ప్రసక్తే లేదని తేల్చి చెప్పారు. ఆ దేశంతో చర్చలు జరపాలని కొందరు సూచనలు చేస్తున్నారని, కానీ.. ఆ దేశంతో భారత్ ఎందుకు చర్చలు జరపాలని ప్రశ్నించారు. జమ్మూ కశ్మీర్ లో మూడు రోజుల పర్యటన కొనసాగుతోంది. ఈ సందర్భంగా బారాముల్లాలో జరిగిన బహిరంగ సభలో అమిత్ షా ప్రసంగించారు. పాక్ తో చర్చలు జరిపేదే లేదని స్పష్టం చేశారు. తాము బారాముల్లా ప్రజలతో మాట్లాడతామని, కశ్మీరు ప్రజలతో మాట్లాడతామన్నారు.
జమ్మూ-కశ్మీరులో 1990వ దశకం నుంచి ఉగ్రవాదం వల్ల 42,000 మంది ప్రాణాలు కోల్పోయారని, ఉగ్రవాదం వల్ల ఎవరైనా లబ్ధి పొందారా? అని ప్రశ్నించారు. జమ్మూ-కశ్మీరు అభివృద్ధిలో వెనుకబడటానికి మూడు కుటుంబాలే కారణమని దుయ్యబట్టారు.ముఫ్తీలు, అబ్దుల్లా కుమారులు,కాంగ్రెస్ పార్టీలు ఇక్కడి ప్రజల సంక్షేమం కోసం ఏమీ చేయలేదని ఆగ్రహం వ్యక్తంచేశారు. ఉగ్రవాదాన్ని నరేంద్ర మోదీ ప్రభుత్వం సహించదని, దానిని తుదముట్టిస్తుందని చెప్పారు. జమ్మూ-కశ్మీరును దేశంలో అత్యంత ప్రశాంతంగా ఉండే ప్రదేశంగా మార్చాలనేది తమ లక్ష్యమని చెప్పారు.
