ప్రధాని నరేంద్ర మోదీ కేదార్ నాథ్ మందిరాన్ని దర్శించుకున్నారు. న్యూఢిల్లీ నుంచి ప్రత్యేక విమానంలో ఉత్తరాఖండ్ కు చేరుకున్నారు. ఈ సందర్భంగా ముఖ్యమంత్రి, ఇతర ఉన్నతాధికారులు ఆయనకు సాదర స్వాగతం పలికారు. అయితే.. ప్రధాని మోదీ కేదార్ నాథ్ ఆలయ సందర్శన సమయంలో ఓ ప్రత్యేకమైన వస్త్రధారణలో కనిపించారు. ఇప్పుడు మోదీ వేసుకున్న డ్రెస్సుపై అందరి లుక్ పడింది. దీనిపైనే అందరూ చర్చించుకుంటున్నారు.
అయితే.. కేదార్ నాథ్ దర్శనం సమయంలో ప్రధాని మోదీ ధరించిన డ్రెస్సు పేరు చోలా డోరా. హిమాచల్ లో నివసించే ఓ మహిళ ప్రధాని మోదీ కోసం ప్రత్యేకంగా చేతితో కుట్టి మరీ తయారు చేసింది. దీనిని మోదీకి బహుమతిగా బహూకరించారు. కొన్ని రోజుల క్రితం మోదీ హిమాచల్ పర్యటనకు వెళ్లారు. ఈ సమయంలోనే ఓ మహిళ చోలా డోరాను బహుమతిగా ఇచ్చింది. ఎక్కడైనా చలి ప్రదేశాలకు వెళ్లిన సమయంలో తాను కచ్చితంగా వేసుకుంటానని మోదీ ఆమెకు హామీ ఇచ్చారు. కేదార్ నాథ్ పర్యటన సందర్భంగా ప్రధాని మోదీ దానిని ధరించారు.
