టాలీవుడ్ మెగాస్టార్ చిరంజీవి ప్రస్తుతం యువ దర్శకుడు మల్లిడి వశిష్ట దర్శకత్వంలో విశ్వంభర మూవీ చేస్తోన్న సంగతి తెలిసిందే. వేగంగా షూటింగ్ జరుపుకుంటోన్న ఈ మూవీ 2025 సంక్రాంతి కి రిలీజ్ కానుంది. ఇక నటుడిగా ఎంతో గొప్ప క్రేజ్ సొంతం చేసుకోవడంతో పాటు అటు పలు సామజిక సేవా కార్యక్రమాలు కూడా ఎప్పటి నుండో నిర్వహిస్తూ తన గొప్ప మనసు చాటుకున్న మెగాస్టార్ చిరంజీవికి 2006లో మన భారత ప్రభుత్వం నుండి పద్మభూషణ్ బిరుదు లభించిన విషయం తెలిసిందే.
అయితే లేటెస్ట్ టాలీవుడ్ క్రేజీ బజ్ ప్రకారం ఈనెల 26న రిపబ్లిక్ డే సందర్భంగా ఆయనని పౌర పురస్కారాల్లో భాగంగా పద్మ విభూషణ్‌తో మన ప్రభుత్వం సత్కరించే అవకాశం ఉన్నట్లు తెలుస్తోంది. దీనిపై సోషల్ మీడియాలో, టాలీవుడ్ వర్గాల్లో బాగా వార్తలు ప్రచారం అవుతున్నాయి. ఈ సంవత్సరం పద్మ అవార్డుల జాబితాలో చిరంజీవి పేరున్నట్లు డిల్లీ నుంచి సమాచారం వచ్చిందట. చలనచిత్ర పరిశ్రమకు ఆయన చేసిన విశిష్ట సేవలకు మాత్రమే కాకుండా, కొవిడ్ మహమ్మారి సమయంలో చేసిన సామాజిక సేవకి గాను ఆయనికి ఈ పురస్కారం ఇవ్వబోతున్నట్లు టాక్. అయితే దీని పై భారత ప్రభుత్వం నుండి అధికారిక ప్రకటన మాత్రం రావాల్సి ఉంది.
