ఇండియన్‌ రైల్వే క్యాటరింగ్‌, టూరిజం కార్పొరేషన్‌ (ఐఆర్‌సీటీసీ) స్కామ్‌ కేసులో బీహార్‌ డిప్యూటీ సీఎం తేజస్వీ యాదవ్‌కు మంజూరైన బెయిల్‌ను రద్దు చేయాలని కోరుతూ సీబీఐ సుప్రీంకోర్టును ఆశ్రయించింది. తేజస్వీ యాదవ్‌ సాదాసీదా వ్యక్తి కాదు. బాగా పలుకుబడి కలిగిన వాడు. ఈ కేసు దర్యాప్తు చేపట్టిన సీబీఐ అధికారులను దూషిస్తూ, బెదిరిస్తూ బహిరంగ హెచ్చరికలు చేశారు. సాక్షులకు ప్రభావితం చేయడానికి ప్రయత్నించారు అని సీబీఐ తన పిటిషన్‌లో పేర్కొంది. దీంతో అత్యున్నత ధర్మాసనం తేజస్వీయాదవ్‌కు నోటీసు జారీ చేసింది. ఈ నెల 28లోగా సమాధానం ఇవ్వాలని నోటీసుల్లో ఆదేశించింది. ఐఆర్‌సీటీసీలో హోటళ్ల నిర్వహణ కాంట్రాక్టు మంజూరు చేయడంలో అవకతవకలు జరిగాయనే ఆరోపణలపై తేజస్వీకి గతంలో సీబీఐ సమన్లు జారీ చేసింది. ఈ కేసులో తేజస్వీకి 2018 అక్టోబర్‌లో బెయిల్ మంజూరైంది.
