బెల్లంకొండ సాయి శ్రీనివాస్ ప్ర‌స్తుతం సాగ‌ర్ కె. చంద్ర ద‌ర్శ‌క‌త్వంలో టైస‌న్ నాయుడు అనే సినిమా చేస్తున్న విషయం తెలిసిందే. శ్రీనివాస్ కెరీర్ లో 10వ సినిమాగా తెర‌కెక్కుతున్న టైస‌న్ నాయుడులో అత‌ను మైక్ టైస‌న్ అభిమానిగా, ఒక బాక్సింగ్ ప్రియుడిగా ప‌వ‌ర్‌ఫుల్ పోలీసాఫీసర్ పాత్ర‌లో న‌టించ‌నున్నాడు. ఈ సినిమా నుంచి ఇప్ప‌టికే రిలీజ్ చేసిన పోస్ట‌ర్లకు మంచి రెస్పాన్స్ వ‌స్తుంది.
ఇదిలా ఉంటే ఈ సినిమాలో మ‌రోసారి బెల్లంబాబుపై హై ఓల్టేజ్ యాక్ష‌న్ ను ప్లాన్ చేస్తున్న‌ట్లు తెలుస్తోంది. రీసెంట్ గా ఈ సినిమా షూటింగ్ షెడ్యూల్ రాజ‌స్థాన్ లో మొద‌లైంది. రెండు వారాల పాటూ జ‌ర‌గ‌నున్న ఈ షెడ్యూల్ లో టీమ్ ఒక అద్భుత‌మైన యాక్ష‌న్ ఎపిసోడ్ ను షూట్ చేయ‌నున్న‌ట్లు తెలుస్తోంది. ఈ యాక్ష‌న్ సీక్వెన్స్ సినిమాలో చాలా స్పెష‌ల్ గా ఉండ‌నున్న‌ట్లు స‌మాచారం.
కీల‌క స‌మ‌యంలో వ‌చ్చే ఈ ఫైట్ చూసి ఆడియ‌న్స్ స‌ర్‌ప్రైజ్ అవ‌డంతో పాటూ షాక‌వుతార‌ని యూనిట్ మెంబ‌ర్స్ అంటున్నారు. ఈ యాక్ష‌న్ సీక్వెన్స్ కోసం శ్రీనివాస్ కొన్ని రిస్కీ స్టంట్స్ కూడా చేస్తున్నాడ‌ట. స్టంట్స్ శివ ద‌ర్శ‌క‌త్వంలో జ‌రుగుతున్న ఈ యాక్ష‌న్ సీక్వెన్స్ ను నైట్ టైమ్ లో షూట్ చేస్తున్నారు. ఇప్ప‌టికే టైస‌న్ నాయుడు సినిమా విష‌యంలో మంచి అంచ‌నాలుండ‌గా, ఈ యాక్ష‌న్ సీక్వెన్స్ గురించి విన్నాక అవి మ‌రింత పెరిగాయి.
