జీవో నెం.1 పై ఏపీ ప్రభుత్వం నేరుగా సుప్రీం కోర్టును ఆశ్రయించింది. దీనిపై మంగళవారం సుప్రీంలో ఓ పిటిషన్ దాఖలు చేసింది. ఏపీ హైకోర్టు దీనిపై కొన్ని రోజుల క్రితం తాత్కాలిక స్టేను విధిస్తూ తీర్పునిచ్చింది. ఈ నేపథ్యంలో ఈ స్టేను సవాల్ చేస్తూ ఏపీ ప్రభుత్వం సుప్రీంను ఆశ్రయించింది. ఈ మేరకు ఓ స్పెషల్ లీవ్ పిటిషన్ ను దాఖలు చేసింది. జీవో నెం.1 అమలును ఈ నెల 23 వరకూ నిలిపేస్తూ ఏపీ హైకోర్టు మధ్యంతర తీర్పునిచ్చిన విషయం తెలిసిందే. సీపీఐ రాష్ట్ర కార్యదర్శి రామ కృష్ణ ఈ జీవో నెం.1 ని తప్పుబడుతూ హైకోర్టును ఆశ్రయించారు. రహదారులపై బహిరంగ సమావేశాలు నిర్వహించకుండా రాజకీయ పార్టీల గొంతును ప్రభుత్వం నొక్కుతోందని హైకోర్టులో పిల్ దాఖలు చేశారు. దీంతో ఈ నెల 23 వరకూ నిలిపేస్తూ ఏపీ హైకోర్టు మధ్యంతర తీర్పునిచ్చింది.
1861 పోలీస్యాక్ట్కు లోబడే జీవో నెం.1 తెచ్చామని అడిషనల్ డీజీ రవిశంకర్ అన్నారు. రోడ్షోలు, పాదయాత్రలు ఆపేందుకే జీవో 1 తెచ్చామన్నది అవాస్తవమన్నారు. కందుకూరు, గుంటూరు విషాద ఘటనల దృష్ట్యా జీవో 1 తెచ్చామని పేర్కొన్నారు. ఏపీలో సభలు, సమావేశాలపై నిషేధం విధించలేదని డీజీ రవిశంకర్ తెలిపారు. కొన్ని కీలక ప్రాంతాల్లోనే వీటిని నియంత్రించాలని చెప్పామన్నారు. అలాగే హైవేలపై పబ్లిక్ మీటింగ్స్ పెట్టకూడదని చెప్పామన్నారు. షరతులతో సభలు, సమావేశాలకు అనుమతి ఉంటుందన్నారు.
